Татарстанда гражданнарга түләүсез юридик ярдәм күрсәтү мөмкинлекләре киңәя
Татарстан Республикасында «Хокукый белемнәр мәктәбе»проекты кысаларында халыкны хокукый агарту буенча актив эш дәвам итә. Шушы көннәрдә «өченче буын университеты» программасын тыңлаучылар өчен ТР Юстиция министрлыгы эшчәнлегенә һәм түләүсез юридик ярдәм алуның заманча мөмкинлекләренә багышланган лекция булды.
Татарстан Республикасы юстиция министрының беренче урынбасары Илья Гомзик халыкка хокукый ярдәм күрсәтү системасын оештыру турында җентекләп сөйләде. Ул билгеләп үткәнчә, Федераль законда түләүсез юридик ярдәм төрләре, аның нигезләре, шулай ук мондый ярдәмгә хокуклы гражданнар категорияләре исемлеге билгеләнгән. Ташламалы категорияләрнең тулы исемлеге Юстиция министрлыгының рәсми сайтында «түләүсез юридик ярдәм»бүлегендә урнаштырылган.
Очрашу барышында гражданнарга юридик ярдәм алу сервислары турында мәгълүмат бирү мәсьәләсенә аерым игътибар бирелде. Республикада берничә уңайлы корал булдырылды:
• Татарстан Республикасы геопорталында түләүсез юридик ярдәм пунктлары, аларның эш графигы һәм контакт белешмәләре турында мәгълүмат булган интерактив картадан файдаланып була;
• ТР Дәүләт хезмәтләре порталында консультацияләр алу шартлары һәм ысуллары белән тиз танышырга мөмкинлек бирә торган "түләүсез юридик ярдәм" махсус гиперссылкасы урнаштырылган;
• «Татарстан Республикасында яшәүче картасы» мобиль кушымтасында онлайн юридик консультацияләр алу өчен аерым бүлек гамәлгә ашырылды.
Илья Гомзик сүзләренчә, яңа сервисларны кертү пандемия чорында аеруча актуаль булды, ул вакытта юридик хезмәтләргә дистанцион керү гражданнарның киң даирәсенә хокукый ярдәм күрсәтергә мөмкинлек бирде. Әйтик, 2024 елда «Татарстан Республикасында яшәүче картасы» мобиль кушымтасы ярдәмендә 46 гражданга түләүсез юридик ярдәм күрсәтелгән, ә 2025 елның 9 аенда инде 101 кешегә.
Татарстанда яшәүчеләр түләүсез юридик ярдәм сорап Дәүләт һәм муниципаль хезмәтләрнең бердәм порталы аша мөрәҗәгать итә алалар, аралашуның уңайлы форматын сайлыйлар: шәхси кабул итү, телефон консультациясе яисә онлайн-очрашу.
Чыганак: Татарстан Республикасы Юстиция министрлыгы