Бердәм килештерүләр кабинеты - килештерү процедуралары механизмын гадиләштерү инструменты.
Бүген Казанда Татарстан Республикасы Министрлар Кабинетының инвестицион климат торышын яхшырту һәм «Нәтиҗәле регион» пилот проектын гамәлгә ашыру мәсьәләләре буенча утырышы узды. Утырыш Татарстан Премьер-министры Алексей Песошин рәислегендә узды. Анда Татарстан Республикасы Президенты Рөстәм Миңнеханов катнашты.
Алексей Песошин билгеләп үткәнчә, республика Хөкүмәте инвестицион потенциалны үстерүгә, инвестицион климатны яхшыртуга һәм бизнес алып бару өчен уңайлы шартлар булдыруга юнәлтелгән эшне дәвам итә.
"Росатом" методологик ярдәме белән административ киртәләрне киметү өчен, республикада "Сквозной инвестицияле агым" проектын гамәлгә ашыру дәвам итә. Проектның төп максаты - инвестиция проектын әзерләү һәм гамәлгә ашыру өчен сарыф ителә торган вакытны һәм ресурсларны кыскарту резервларын эзләү, шул исәптән инвестор өчен төп процедураларны узу.
Кайбер министрлыклар һәм ресурслар белән тәэмин итүче оешмалар вәкилләре бизнеска төрле документларны рәсмиләштерү, мәҗбүри процедураларны узу, инженерлык челтәрләренә тоташтыру белән бәйле хезмәтләр күрсәтү срокларын кыскарту буенча уздырыла торган эш турында сөйләделәр. Аерым алганда, бюрократик процедураларның бер өлеше төшереп калдырыла, административ регламентлар үзгәрә.
Инженерлык челтәрләренә тоташканда килештерү процедуралары механизмын гадиләштерүгә ярдәм итүче инструмент булып "Бердәм килешү кабинеты" электрон сервисы булырга тиеш. Аның бурычы - инженерлык инфраструктурасы челтәрләренә техник тоташуның барлык катнашучылары тарафыннан онлайн-форматта документларны параллель карау һәм килештерү буенча эш алып бару.
Рөстәм Миңнеханов ассызыклаганча, инвестицияләр икътисадый тотрыклылыкны һәм технологик лидерлыкны тәэмин итүнең төп коралы булып тора. Ул Хөкүмәткә, муниципалитетларга һәм ресурслар белән тәэмин итүче оешмаларга инвестиция процессларын узу срокларын кыскарту буенча уртак эшне дәвам итәргә кушты.